Dawn l-offiżi huma marbuta mill-qrib mal-użu ta’ għodda u l-pjattaformi diġitali, inkluż il-mezzi soċjali jew l-apps tal-messaġġi. Dawn jinkludu atti bħal vjolenza ċibernetika, kif ukoll il-frodi online u l-falsifikazzjoni elettronika. F’sitwazzjonijiet li jinvolvu l-vjolenza , il-fastidju jew inċitament għall-vjolenza jew il-mibegħda online, it-teknoloġija tippermetti li l-effetti negattivi ta’ din l-imġiba jinxterdu malajr u jinfirxu. Din l-amplifikazzjoni wiesgħa u rapida tista’ tkabbar l-impatt fuq il-vittmi, u ta’ spiss twassal għal ħsara serja u dejjiema.

Il-gwerra tista’ taffettwa lin-nies f’ħafna modi. Li tkun vittma jew xhud ta' reati mwettqa f’kunflitt armat jew vjolenza tal-massa jista' jikkawża kemm korrimenti fiżiċi kif ukoll ħsara psikoloġika fit-tul. Nies li jaħarbu l-gwerer huma f’riskju akbar li jkunu vittmi ta’ reati serji bħal traffikar ta' bnedmin, sfruttament ta' xogħol u sfruttament sesswali.  

Il-vjolenza kontra persuna tista’ tinkludi fastidju, attakk, serq u omiċidju.

Il-vjolenza abbażi tal-ġeneru hija vjolenza diretta lejn persuna minħabba l-ġeneru ta’ dik il-persuna jew vjolenza li taffettwa persuni ta’ ġeneru partikolari b’mod sproporzjonat. Din tinkludi vjolenza fuq in-nisa, vjolenza domestika fuq in-nisa, l-irġiel jew it-tfal li jgħixu fl-istess unità domestika.

Reat ta’ mibegħda ksenofobika huwa reat kriminali mmotivat minn preġudizzju jew ostilità fil-konfront ta' persuni minħabba d-dixxendenza, l-oriġini nazzjonali jew etnika reali jew perċepita tagħhom. B'mod ġenerali, il-ksenofobija hija attitudni, preġudizzju jew imġiba li tirrifjuta, teskludi u ħafna drabi tkasbar persuna jew grupp, abbażi tal-perċezzjoni li dawn huma barranin jew ma jappartjenux fil-komunità, fis-soċjetà jew li huma aljeni għall-identità nazzjonali.

Reat ta' mibegħda kontra l-LGBTIQ huwa reat kriminali li huwa mmotivat minn ostilità jew preġudizzju fil-konfront ta' persuni li huma LGBTIQ (jew li huma pperċepiti bħala tali). LGBTIQ tirreferi għal persuni li huma leżbjani, gay, bisesswali, trans, intersesswali jew queer.

Il-vjolenza kontra t-tfal tinkludi l-forom kollha ta’ ħsara, bħal vjolenza fiżika jew mentali, korriment jew abbuż, traskuraġni jew trattament negliġenti, moħqrija jew sfruttament, inkluż l-abbuż sesswali kontra t-tfal. Din tista’ tieħu bosta forom u tista’ titwettaq minn kulħadd, inklużi dawk qrib tat-tfal jew persuni f’pożizzjoni ta’ awtorità (eż. ġenituri, qraba, persunal involut fl-edukazzjoni jew persuni li jieħdu ħsiebhom).